Ухаарал

Бусдын гэмийг намрын үүл мэт илбэмз. Өөрийн гэмийг нарийн тоос төдий үл шинжлэх хүмүүн бид завгүй амьдралын хэмнэл дунд юуны төлөө өдөр шөнөгүй гүйлдэцгээнэ вэ. Аз жаргалын төлөө гэсэн атлаа хажууханд байх аз жаргал, баяр баясгаланг анхаарах ч анзаарах ч сөхөөгүй амьдраад л. Үнэндээ бол амьдрах ч завгүй амьдрал. 

Гэр бүлээ жаргаана гээд л гүйгээд л байсан. Нэг сэхээ ороход хүүхэд чинь танихгүй болчихсон байх вий. Өнгөрсөн хойно эргээд харсан чинь хамгийн чухад зүйлсдээ цаг зав гаргалгүй өнгөрөөсөн байх вий гэдгээ эргэн нэг санаж сайтар нэг бодохтун.

Ашиг алдрын зэрэг хөөж яахан гүйцэх билээ. Аминч хүслийн цангааг тайлж яахан барахав. Мөнгөөр аргаж болдоггүй мөнх бусыг сайтар сана. Өнгөөр хуурч болдоггүй үйлийн үрийг бодолтой. Тиймээс өнчин доройг асарч үрийн буянаа сайтар нэм. Өтгөс буурайг өргөж насны буянаа хурааж хайрла.

Та бид юмс үзэгдлийн талаарх өөрийн төсөөллөө тухайн юмсын мөн чанар мэтээр дүгнэдэг билээ. Эдгээр дүгнэлтээс зан авир, хандлага төрдөг бөгөөд хэрвээ та амьдралдаа жижиг сажиг өөрчлөлт хийх гэж байгаа бол зөвхөн хандлага, зан авираа сайтар ухаар. Тиймээс хамгийн сайн найз тань та өөрөө. Бас хамгийн муу дайсан нь та өөрөө гэдгээ бод.

Доорх тоглуулагчаар сонсоорой.

Ukhaaral